ડૉ. પી. વી. દોશી (પપ્પાજી)

અરવિંદભાઈ મણીઆરની સ્મૃતિમાં ગઠિત 'અરવિંદભાઈ મણીઆર જનકલ્યાણ ટ્રસ્ટ'ની સ્થાપનાકાળથી પપ્પાજીની પ્રેરણા અને તેમના નેતૃત્વમાં આ ટ્રસ્ટની જનકલ્યાણની ભાવનાને સમાજમાં ઉજાગર કરવા અને તે અંગેની વ્યવસ્થા અને સમાજના અલગ અલગ સેવાક્ષેત્રમાં યોગદાન માટેની વ્યવસ્થા તથા કાર્યક્રમો કરવા માટે અથાગ પરિશ્રમ પપ્પાજીએ કરેલ હતો.
આ ટ્રસ્ટના સ્થાપક પ્રમુખ તરીકેની સર્વે જવાબદારી અને તે અંગેના કાર્યમાં તેઓ જીવનપર્યંત સક્રિય રહ્યા હતા. પપ્પાજીએ રાષ્ટ્રીય સ્વયંસેવક સંઘના ગુજરાત પ્રાંતના સંઘચાલક તરીકેની જવાબદારી નિભાવી હતી. સંઘના સંસ્કારો અને વિચારોની તેમણે શરૂ કરેલ દરેક સંગઠનોમાં કાળજીપૂર્વક માવજત કરી હતી, તેમાંનું આ જનકલ્યાણ ટ્રસ્ટ પણ એક ઉત્તમ ઉદાહરણ છે. વ્યવસાયે દંત ચિકિત્સક તરીકેની તેમની કારકિર્દી પણ લોકોની સેવા કરવા માટેનું ઉત્તમ સાધન તેમણે તેમના જીવનમાં પ્રસ્થાપિત કરેલ હતું. દરેક ક્ષેત્રના લોકોને સાંકળીને સેવાયજ્ઞમાં સાથે જોડવાના તેમના પ્રયત્નોનું ફળ આજે પણ યાદગાર છે. આવી વ્યક્તિને એટલે જ લોકોએ 'પપ્પાજી'નું પ્રેમભર્યું નામ આપ્યું હતું.

વૈદ્ય ડો. રમણીકભાઈ

અરવિંદભાઈ મણીઆર જનકલ્યાણ ટ્રસ્ટની સ્થાપનાથી ટ્રસ્ટી તરીકેની જવાબદારી નિભાવનાર રમણીકભાઈ કાબેલ, અનુભવી અને કર્મઠ કાર્યકર્તા હતા. તેઓ વ્યવસાયે વૈદ્ય તરીકેની સેવા આપતા હતા. તેમના આ વ્યવસાયમાં તેમની સેવાકીય પ્રવૃત્તિઓ તો હતી જ, સાથોસાથ તેમના જીવનની આધ્યાત્મિકતા અને ઈશ્વર પ્રત્યેની તેમની શ્રદ્ધાએ મહત્ત્વનો ભાગ ભજવેલ હતો.
શરૂઆતથી સંઘના સ્વયંસેવક તરીકે અને સાથોસાથ રાજકીય જીવનમાં પણ તેમનું યોગદાન મહત્ત્વનું હતું. રાજકોટ મ્યુનિસિપલ કોર્પોરેશનમાં દીર્ઘકાળ સુધી લોકોની સેવા કરનાર રમણીકભાઈની મ્યુનિસિપલ કોર્પોરેશનમાં સ્ટેન્ડિંગ કમિટીના ચેરમેન તરીકેની કામગીરી યાદગાર છે.